Standartlaşdırma, Metrologiya və Patent üzrə Dövlət Komitəsinin müfəttişləri cari ilin mart ayı ərzində Bakı şəhərində 20 təsərrüfat subyektində araşdırma aparmışdır. Bunlardan 10-u təkrar xarakter daşımışdır.
Komitəsinin yaydığı məlumata əsasən Dövlət nəzarəti planına əsasən təşkil olunan monitorinq zamanı bir sıra qanun pozuntuları aşkar edilmişdir.
Həmin nöqsanların aradan qaldırılması üçün müəssisə rəhbərlərinə 9 iradnamə, normativ sənədlərin tələblərinə cavab verməyən ümumi dəyəri 3894 manat olan məhsul partiyasının satışının qadağan olunması barədə 25 tələbnamə verilmiş, o cümlədən, istehsal prosesinin tələblərini pozaraq antisanitariya şəraitində məhsul istehsal edən 7 müəssisədə məhsul növünün istehsalı və satışı tam qadağan edilmişdir. Bunlar unlu qənnadı məmulatlar, süd məhsulları və qənd istehsal edən müəssisələrdir.
Digər 3 müəssisədə isə verilmiş iradnamələr üzrə nöqsanların aradan qaldırıldığı məlum olmuş və istehsalın davam etdirilməsi üçün icazə verilmişdir.